一周三件 [錢雋] 20151228 -- 五礦建設兜轉

市場搵topic，資金搵出路，內房由之前講都懶理，到呢期開始有番啲氣候，嚟緊仲keep住炒阿爺寬鬆政策。呢轉揀，揀隻仲挨喺5年底、大落後嘅五礦建設（230），央企當中，佢PB數一數二至平。
五礦建設到今年6月尾每股NAV近2.5元，現價（0.91元）PB得0.36倍。央企內房旗艦，華潤置地（1109）一倍樓上，金茂（817）銷情靚仔，PB收窄到0.74倍，又大悅城（207）0.57倍。而地方窗口當中，深控（604）亦收窄到得0.8倍PB。五礦建設係繼保利（119，0.31倍PB）之後，PB至平選擇。

300億潛在注資規模

今年第二季以嚟，祖國樓市發力，特別係一線地區，好似珠三角、上海等地，一啲都唔削。而今年頭三季，珠三角商品房銷售5,828萬平方米，同比增近36%。五礦建設喺呢區土儲近980萬平方呎，佔集團最大土儲比重。再講，嚟緊雙降機會大，加埋阿爺內房寬鬆政策，五礦建設繼續有point炒，兼有實際支持。
又呢期中資重組注資浪接浪，繼上海電氣（2727），啱啱有中國電力新能源（735）停牌，報道中電新能源又係等緊大型注資。五礦建設又點？央國企重組，五礦系係大熱，而五礦建設係五礦系內唯一內房旗艦，可獲注資潛在規模達到300億元，係五礦建設30億元市值嘅10倍。五礦建設有多個憧憬，市值同業務，遲早肥肥白白。
唔扯咁遠，呢轉煲落後，五礦建設追最近磅嘅大悅城0.57倍PB，都講緊要升57%，到1.43元。到時，五礦建設市值，都係47億元咁大把。